Мантра

Мантра
«Шындық дүниеге жалаңаш күйінде келген жоқ,
нышандар мен бейнелер арқылы келді.
Ол, оны басқаша еш үйрете алмайды».

Ескі Евангелие жазбасынан

Осылай сөйлесем...
ұруға шоқпарың,
көмуге дайын да шығар күрегің,
кәпір дейсіңдер,
азғын дейсіңдер білемін.
Осынау көтерем ойыңды
соңғы дем кеудемнен шыққанша,
қайтейін...
аялап, арқалап,
амал жоқ, жүремін.
Жолымнан былай тұр...
талқаның біткенше
қызыл тән шыдай тұр.
Ол рас...
Сақалы сапсиған ескі ақыл бәрін де қиратты,
күйретті...
...кеудеге өтіңіз
Жүз он төрт сүрені жүректе бүрлетіп,
қаныңда гүлдетіп
Қабырғаң астында Құдай тұр.
Кей уақ...
кеудем бір лапылдап жанады,
ойымда мың сауал
өзендей ағады.
«Шын Құдай – сөз» дейді
іштегі бір сыңғыр, –
«ЖАРАТҚАН – ЖАЗУДАН ТАМҒАН НҰР»
Сол ғана өзгертіп,
сол ғана көгертпек санаңды...»
деп қалқып тұрады манағы.
Сыңғыр мен символдар –
тәу етер қағбам,
мен соның заңына бағынам.
Сананың ағысы –
мінәжат мекенім,
бес мәрте маңынан табылам.
Бәрінің үстінен шығандап қарайтын
шыңырау, тым шексіз
бір биік межені сағынам.
...Тағдыр кілт үзілсе,
Ақ ажал – сыйлығым,
өзіме көшеді
ендігі билігім.
Сол күні...
баршаны орнынан тұрғызған
жаназа намазым –
бәлкім,
құлдықтан құтқарған
...соңғы гимнім.